大地回春，對抗「霉」花有辦法

一到春天，好多朋友都會諗住飛去日本睇櫻花，而師傅仔我就貼地 D ，會計劃好如何避免家居發霉問題。「回南天」嘅潮濕天氣，可以令單位牆身或者傢俬滲水，引起一團團擾人嘅「霉」花滋生，除左影響外觀，更會危害身體健康。究竟點樣先可能令家居保持乾爽舒適呢？

師傅仔為你送上家居防霉小貼士，從此防霉就話咁易啦～

方法一：窗門開關要適時

師傅仔建議大家每日一早一晚要緊閉家中嘅窗門，因為依兩個時段嘅濕氣較高，關閉窗門有助減低濕氣潛入屋企嘅機會。相反，其餘時間就要保持室內通風，可考慮用風扇吹向一些平時唔容易通風嘅地方，例如客廳牆角及櫃底，咁就可以保持陰暗地方乾爽啦～

方法二：善用工具抽濕氣

如遇上濕度較高或梅雨不斷嘅日子，師傅仔建議大家使用抽濕機來降低室內濕度、保持乾爽，避免霉斑滋生。此外，大家更可使用長炭或用布將粉筆包好放入衣櫃，依兩樣都係有吸濕作用嘅小工具，可以保持衣物乾爽架～

方法三：輕鬆除霉有妙法

除左做足預防工作之外，大家亦可主動清理霉菌。大家可嘗試把綿花放進絲襪內，並綁在掃把上，再利用靜電吸走天花嘅灰塵和霉菌，非常方便。另外，如針對廚房嘅霉菌，使用檸檬汁及牙膏就可以除霉兼除臭，大家不妨一試丫！